Hengjekøye er ei relativt ny overnattingsform som har skote i vêret dei siste åra. Spesielt i låglandet, med god tilgang på tre, er det enkelt å finne ein stad å hengje opp køya. Soving i hengjekøye krev noko tilvenning, og du er meir utsett for vêr enn inne i eit telt. Fordelen er at dei enklaste hengjekøyene veg lite og er lettare å bere med seg enn eit telt.

Du treng: hengjekøye og opphengsstroppar, liggjeunderlag og sovepose. Du bør òg ha med tarp eller presenning, tau eller bardunar og teltpluggar i tilfelle nedbør.

Tretelt er ein spennande kombinasjon av telt og hengjekøye. Dette er òg ei relativt ny overnattingsform, som passar for dei som liker seg best over bakken. Tretelta finst i ulike variantar for éin til tre personar. Å sove i tretelt minner veldig om å overnatte i hengjekøye.

Tretelt er ganske dyre, men kan lånast/leigast hos mellom andre BUA og Frilager. For å få sett opp teltet treng du tre solide tre som står i ein trekant. Teltet blir jekka på plass med jekkestroppar. Samanlikna med hengjekøye og vanlege telt er vekta ganske høg. Derfor eignar tretelt seg best for korte gåturar, eller padleturar.

Du treng: tretelt, liggjeunderlag og sovepose.

Tips og triks til montering av tretelt (speidersport.no).