Med presenning kan vi lage vårt eige telt. Mange bruker nemninga tarp, som er det engelske ordet for presenning. Det er lettast å overnatte i ein skog eller ein stad der det er tre, men det er òg mogleg å bruke vandrestavar som teltstenger (sjå bilete).

Både lette og tyngre presenningar fungerer godt. Plastpresenningar som du til dømes får kjøpt på Biltema, er billigare enn dei tynne presenningane som blir selde under nemninga tarp. Plastpresenningane er ofte tyngre og tek meir plass enn tynne presenningar av tøy. Haldbarheita er god på begge, så sant dei blir godt bardunerte.

Ein del vindsekker og jervenduk kan òg slåast opp som ein presenning.

Du treng: tarp eller presenning, tau eller bardunar, teltpluggar, liggjeunderlag og sovepose.

Det enklaste oppsettet med presenning er å lage eit tak som går ned på begge sider. Strekk opp presenningen på midten og bind fast eit tau eller ein bardun i presenningen på kvar side. Fest så taua i eit tre. Deretter strekkjer du ut dei fire hjørna. Hugs å ha tau i hjørna òg, før du festar taua i bakken med teltpluggar, pinnar eller røter på bakken.

Det er òg mogleg å lage ein enkel gapahuk av berre presenning, eller som her, ein utslått jervenduk. Duken er festa til trea i dei øvste hjørna og til bakken i dei nedste hjørna. Hugs å leggje opninga i le for vind og regn. Ver òg obs på stort vindfang, ei slik løysing toler ikkje sterk vind.

Gapahuken spenner vi opp mellom to tre, eller andre høge punkt vi får feste i, og så strekkjer vi han skrått bakover mot bakken slik at vi får eit skråtak vi kan liggje under. Det er lurt å tenkje over at det skal vere plass til alle i turfølgjet og bagasjen deira under taket. Bakken bør vere relativt flat med tanke på liggjekomfort.

Skal du ha bål framfor huken, fungerer han best når han har rundt 45 graders helling. Dette bidreg til at varmen slepper inn i huken, og huken fungerer som ein reflektor som slyngjer varmen tilbake i ryggen din.

Når vi byggjer gapahuken, er det lurt å byggje han slik at han vender mot ein reflektor (ein stor stein, fjellvegg eller liknande som bålet kan byggjast mot), og helst med den dominante vindretninga i ryggen.

Reflektoren bidreg med å slyngje varme inn i gapahuken, i staden for at varmen berre forsvinn ut i lufta. Manglar du ein reflektor, går det an å byggje ein av stokkar.

Følg steg 1–4 i oppskrifta på enkel gapahuk.

5. Legg tynne kvister på tvers av stokkane som går ned mot bakken. Vev desse fast mellom stokkane.

6. Tett taket med granbar eller ev. greiner med blad frå andre tre. Det må leggjast svært tett.
💡
Tips: Det er lurt å starte tettinga nede ved bakken og så jobbe seg oppover.

Begynn å leggje nedst i heile breidda, før du jobbar deg oppover med god overlapp steg for steg. Tenk at vatn skal kunne renne heile vegen frå toppen og ned til bakken.