Kompasskurs bruker vi når vi treng å vite kva retning vi skal gå i. Det kan vere dersom vi har få leielinjer å følgje, terrenget er einsarta og ope eller det er tåke og dårleg sikt.
Slik tek du ut og går ein kompasskurs
- Legg kompasset slik at kanten på kompasset følgjer den rette strekninga frå den staden du står, til den staden du skal. Pass på at marsjpila peikar i den retninga du skal gå.
- Vri kompasshuset så linjene i kompasshuset blir parallelle med nord–sør-linjene på kartet (det blå rutenettet). Pass på at nordpila i kompasshuset peikar mot nord på kartet. Nord er oppover på kartet når kartet ligg slik at du kan lese orda.
- Hald kompasset flatt i handa. Den raude kompassnåla vil svinge fritt og stille seg inn så ho peikar mot nord. Drei kompasset til kompassnåla ligg saman med den raude nordpila.
- No peikar marsjpila i den retninga du skal gå. Sikt inn eit punkt som ligg i den retninga marsjpila peikar. Gå dit og finn eit nytt siktepunkt.
NB! Nokre gamle orienteringskompass har 400 grader på gradeskiva. Sjekk alltid at alle har 360-graderskompass før de tek ut kurs, elles vil de få ulike kursar.
Nokre tips til kompasskurs
- Hugs at marsjpila alltid skal peike mot målet (staden du skal til).
- Ver nøye når du tek ut kursen.
- Det er fort gjort å få fleire grader feil om du er unøyaktig.
- Sjå kva himmelretning kursen du har teke ut, ligg i, og sjekk at gradene stemmer med himmelretninga du skal gå.
- NORD vil vere rundt 360 eller 0 grader.
- ØST vil vere rundt 90 grader.
- SØR vil vere rundt 180 grader.
- VEST vil vere rundt 270 grader.
- Ta ut korte kompasskursar.
- maks eit par kilometer, då er det lettare å halde kursen
- Finn eit siktepunkt eller oppfang.
- då er det lettare å halde kursen og vite at du er på rett stad
- Dersom du går lenge utan siktepunkt eller haldepunkt, så sjekk GPS med jamne mellomrom for å forsikre deg om at du er der du trur.
Tekst:
- Gina Wigestrand, Snuitide (2021)
Blystad, J.T. (red.) (2010). Turlederboka. Oslo. Den Norske Turistforening
Friis, K.N. (2010). Slik tar du ut en kompasskurs. I Blystad, J.T. (red.). Turlederboka, s. 74. Den Norske Turistforening
Kjeldsen, R., Furuly, C.D. og Rolseth, B.E. (2019). Bruk av kart og kompass. NDLA. Henta frå https://ndla.no/subject:13/topic:b40c0a75-7f89-4806-9e47-908ab0a4cee8/topic:ec9cb50e-596d-4823-9ee8-24621082d44e/resource:42bc98e7-06e1-475d-818b-472b649b3ce2?filters=urn:filter:ba75ac53-15eb-4c7a-a08a-b8d5cd19a875
Kjeldsen, R., Furuly, C.D. og Rolseth, B.E. (2019). Bruk av kart og kompass. NDLA. Henta frå https://ndla.no/nn/subject:187c1484-84a5-474d-bf63-0c7915809a7d/topic:c44dbf18-fca3-48fb-bc59-70b2a1c53cc0/resource:42bc98e7-06e1-475d-818b-472b649b3ce2
Kolbjørnsgard, S. (2021). Ta ut kompasskurs. [Videoklipp]. https://vimeo.com/736818133
Statens kartverk (2021). Lær deg kart og kompass. Henta frå https://www.kartverket.no/til-lands/kart/turkart/lar-deg-kart-og-kompass
Unger, L.C. (2010). Orientering. I Blystad, J.T. (red.). Turlederboka, s. 67–83. Oslo. Den Norske Turistforening
