Dei brune linjene på kartet er høgdekurver som viser høgdeforskjellen i terrenget. Jo tettare det er mellom kurvene, dess brattare er terrenget.
Ekvidistansen fortel kor stor høgdeforskjell det er mellom kvar kurve. På eit turkart i målestokken 1 : 50 000 er ekvidistansen 20 meter. Det betyr at dersom vi har flytta oss oppover i terrenget frå den eine streken til den neste, er høgdeforskjellen 20 meter. Jo fleire meter i ekvidistanse, dess mindre detaljert er kartet.
Det står alltid på kartet kva ekvidistansen er.
Målestokk | Avstand i terreng | Bruksområde | Informasjon |
1 : 100 000 | 1 cm = 1 kilometer | Planlegging | Gir svært lite detaljar og er vanskeleg å gå etter i kupert terreng. |
1 : 50 000 | 1 cm = 500 meter
2 cm = 1 kilometer | Fjelltur | Vanleg målestokk på turkart, men ver obs på at mindre stup (10–15 meter) ofte ikkje er synlege på kartet. |
1 : 25 000 | 1 cm = 250 meter
4 cm = 1 kilometer | Nærtur, dagstur i fjellet | Fleire og fleire turkart over populære turområde i nærmiljøet har denne målestokken. Gir ofte gode detaljar, men er tungvinne å bruke om du skal gå langt (må ha med ein del fleire kart). |
1 : 10 000 | 1 cm = 100 meter
10 cm = 1 kilometer | Orientering og korte turar i nærmiljøet | Vanleg orienteringskart som er svært detaljert og viser både steinar og stup. |
Ulike kart med kartgrunnlag, målestokk og ekvidistanse
Tekst:
- Gina Wigestrand, Snuitide (2021)
