Pakkelista er berekna på tur frå hytte til hytte. Ei utrusting utan ski/støvlar/stavar/mat/drikke vil vege totalt mellom 10 og 14 kg. Med klede på kroppen kan vekta på sekken gå ned til ca. 8–10 kg.

Skal du sove ute, så sjekk ut 🏕️Pakkeliste for teltturen (nynorsk).

Utstyr

• fjellski og stavar med brei trinse
• ryggsekk med passe volum til innhald, 50–70 liter
• vasstette pakkeposar
• vindsekk
• spade og søkjestong
• sovepose (tilstrekkeleg varm for nødovernatting) og lakenpose (ved overnatting på DNT-hytter)
• liggjeunderlag
• førstehjelpssaker med bl.a. gnagsårplaster/sportstape
• toalettsaker, lett handkle
• litt toalettpapir i pose
• alpinbriller
• solbriller og solkrem
• kart, kompass og kartmappe (ev. GPS)
• multiverktøy
• fyrstikker/lighter
• hovudlykt
• termos
• mat for dagen og drikkeflaske
• skismørjing, ev. òg feller
• pengar/kort
• DNT-nøkkel
• medlemskort i DNT

Tips

• Med to skift ullundertøy har du eitt sett på tur og det andre inne på hytta. Skyl/vask undertøyet ved behov når du er på hytta, og heng det på tørkerommet, så har du det reint og tørt til neste dag.
• «Lette inneklede» kan vere ei tynn/lett mikrofiberbukse i tillegg til det ekstra settet du har med ullundertøy.
• Bruk gjerne bivuakksko (dun/kunstfiber) som lette innesko. Det gir tryggleik når du bruker BC-skisko som kan fryse til bindinga.
• Ei varmejakke gir rask og effektiv varme i pausar. Ta ho utanpå ytterjakka i tørt vêr.
• Ytterklede i vindtett bomull eller mikrofiber vil oftast gi betre fukttransport enn allvêrsklede. Du må då vurdere vêrvarselet og eventuelt ha regntøy i sekken.
• Ein sendar/mottakar er tilrådd på turar i skredutsett terreng. Øv deg på å bruke skredutstyret før turen!
• Ei søkjestong er nyttig ikkje berre til å søkje i skred med, men òg til å vurdere om ein snøskavl er stor nok til å grave seg inn i.
• Vindsekk, tilstrekkeleg varm sovepose og liggjeunderlag skal alltid vere med. Dette reddar liv kvar vinter.

Tekst

• «Døme på pakkeliste til vintertur»: Den Norske Turistforening (2019)